Nachdem e. ksl. Mt. etc. unnsere vilfelltige, unnserer freundtschafft gezimennde unnd wierdige grüeß presentiert unnd angebotten sein, so wellen e. Mt. etc. freundtlich wissen, das jüngst abermallß an die glückhsehlige Porten unnd berüembten, auch hocherhebten hof unnsers glückhafftigen, mächtigen unnd durchleuchtigen kaisers, der da ist ain kaiser der viertheill der wellt, dem Gott sein sig sterche, erhallte unnd sein macht mehre, e. Mt. etc. freundtlichs schreiben gelanngt ist, in wellchem ir zuverstehen geben, allermassen wie in zeit e. Mt. etc. vatters, mit der erhabten unnd mächtigen Porten der hochait unnsers kaisers unnd ime frid unnd guete rueh gewest, also haben e. Mt. etc. begert, das er auch gleihfallß mit iro seye, unnd darüber bey seiner hochait umb deren ksl. haubtbrief angehallten, wellchen dann, auf sollch euer Mt. etc. ersuchen, die durchleuchtigkhait unnsers glückhseligen und berüembten kaisers e. Mt. etc. widerfaren lassen hat, der e. Mt. etc. dann woll zuekhomen ist.

Mer haben e. Mt. etc. vermellt, das sy hinfüro steiff und khrefftig zu dem gemainen friden unnd gueten rueh bleiben, also auch ir versprochne jarliche verehrung nit aufhallten, sowider ehist herein schickhen wellen. Wie dann e. Mt. etc. in khainem punct zumannglen gesinnet seye, so wellen auch e. Mt. etc. in khainem punct zumannglen gesinnet seye, sowellen an irem graniz khriegs volckh ernstlich bevelchen unnd einbinden, das niemanndt wider die pacta des fridens ychtes thüe noch begehe, die übertretter aber, so sich wider die pacta unnd sicherheit vergreiffen wurden, sollen gestrafft, unnd sonnst yederzeit zu erhaltung des fridß unnd gueten rue aller vleiß unnd embßigkhait gebraucht unnd fürkhert werden, hergegen aber unnderlasse das musulmannisch khriegs vollkh nimer nit, an der granizen allerley streiff, verhörungen, beschedigungen, übertredtungen und belestigsungen zuüeben, auch von den stetten unnd fleckhen die zuvor ainnichen tribut niemallß daher geben, denselben vor inen abzufordern, sy deß halben hart zumolestiren, unnd der tribut von inen mit gewallt zunemen, derwegen dann e. Mt. etc. an dieselben, die sollicher gstallt wider den frid hanndlen, ernstliche scharffe bevelch, einsehen unnd abstellung begert.

Es haben auch e. Mt. etc. gemellt, wie sy dise, allß auch anndere e. Mt. etc. hanndlungen unnd notturfft irer an diser fürtrefflichen, glückhseligen unnd namhafften seiner hochait Porten der dienennden potschafft David Ungnaden anbevolhen unnd auferlegt hetten, wellicher Ungnad, uber das er ain ausfüerlich scriptum, in dem er so vil schaden unnd übertrettungen, so das musulmanisch khriegs volckh in e. Mt. etc. gebiedt gethan, welliches e. Mt. etc. dörffer unnd stett angefallen, verwüesst, vich unnd leuth hinweckh gefüert, sonnst auch allerlay übelthaten unnd muetwillen getriben, angezogen, übergeben, hat er daneben auch diß fürgebracht. Wie der weida aus Sibenbürgen etliche hungerische herrn, wider die pacta des fridens, mit villen verhaissungen an sich bringen unnd ziehen wolle, das er auch deßwegen alberait schon hieher geschriben habe, welliche sachen, alls sy vor dem thron seiner ksl. durchleuchtigkhait referirt worden, unnd sein hochait sy angehört unnd verstannden, hat sy verordnet, das man von dem selben scripto der schaden unnd beschwerungen, so gedachte e. Mt. etc. potschafft übergeben, von wort zu wort abschrifften machen unnd sy dem wezir Mustafa Bassa zu Ofen, auch dem Ferhat Beg in Bossna zueschickhen unnd in andtwordt darauf erfordern solle, was doch die ursach sollcher hänndl sey, woher der ursprung khome, das dem frid unnd gueten rueh zuwider dergleichen schaden unnd muetwillen geuebt werden, dann es nit zimblich, das ichtes wider die pacta des fridens beschehe, unnd also ist inen auferlegt unnd eingebunden worden, wie unrechtmäßig es seye, das man ainiche fridswiderwärtigthaiten sich erzaigen unnd fürgehen lasst.

Hierynnen aber sey e. Mt. etc. zuwissen, das noch bißher von dem weyda aus Sibenbürgen dergleichen khains herkhomen ist, unnd do er schon ain sollches hieher gethan hette, so würde doch sein hochait wenig darauf geschäzt, oder darvon gehallten haben. Dann das glückhseligen unnd mächtigen kaisers will ist nit, das wider den zwischen seiner hocheit unnd e. Mt. etc. wesenden friden unnd guete rueh ichtes erwaxen unnd fürgehen, sonnder man alzeit den frid unnd guete rueh hallten sollt. Unnser khaiser bleibt woll allzeit bestanndig unnd vesst in den pacten des fridß unnd sicherheit, deßgleichen auch seine diennstleuth an den granizen thuen gar nichts wider den ksl. bevelch, sonnder haltten imerdar die condicionen der frids pacten, erzaigen khain widerwertigkheit, unnd enthallten sich von denen dingen, die di pacta trennen unnd perturbiern möchten. Aber euer Mt. etc. ublthätter unnd boßhafftige diennstleüth an euer Mt. etc. granizen, werden nit, wie es das heilig recht unnd die billichait erfordert, refrenirt. Darumben dann, wann sy in das gebiedt seiner ksl. hocheit übertretten, füeren vieh unnd leuth hinweckh und thuen sonst schaden, so zeucht das musulmanische khriegs khriegshor ausdaur, eifer unnd inbrüenstigkheit, so sy zu irer religion tragen, alß dann auch eben diser mainung aus, gleich wie auf das geyaid irer feind, unnd wellen gleich fallß sy ir sterkh unnd mannhait erzaigen, brauchen auch allen ernst unnd vleiß sich zubeschüzen.

Nach dem willen des höchsten Gottes soll von disem theill khain widerwärtigkheit erscheinen noch zuegelassen, sonnder die hanndlung des fridß unnd gueten rueh, wie zuvor, unnd sich es aignet, also auch noch geehrt unnd gehallten werden, deßgleichen beschehe auch bey euch, unnd e. Mt. etc. verehrung, die sy an die gleickhselig Porten zuordnen pflegt, die werde zu rechter zeit geschickht, in dem man dann allen vleiß gebrauchen, unnd die gewondtliche bestimbte zeit nit furüber gehen lassen solle.